Fittex għal nanomaterjali
The new ECHA CHEM database has been released by ECHA. See for more information on the transition to ECHA CHEM. More
Nanomaterials data shown here derives from the REACH registration data on the current Dissemination Platform, which is no longer maintained; it remains frozen as of 19th May 2023. Up-to-date REACH registration data is published only on ECHA CHEM. Unfortunately, there is no possibility to connect that data to this portal, nor for the time being to allow searches in ECHA CHEM by nanomaterials properties or inventories.
We appreciate your understanding during this transition period.
DISSEMINATION
PLATFORM
EUON - EU Observatory for Nanomaterials
Nanomaterials in the EU market
Hawnhekk tista’ tfittex nanomaterjali li bħalissa jinsabu fis-suq tal-Unjoni Ewropea (UE). Ir-riżultati ta’ dan it-tiftix jinkisbu mill-bażi tad-data pubblika dwar is-sustanzi kimiċi tal-Aġenzija Ewropea għas-Sustanzi Kimiċi (ECHA); u r-riżultati jinkludu wkoll data rkuprata u pproċessata minn diversi sorsi ta’ data esterni, kif deskritt hawn taħt.
- Reġistrazzjonijiet ta’ REACH: Mill-1 ta’ Jannar 2020, ir-Regolament (KE) Nru 1907/2006 (ir-Regolament REACH) jirrikjedi li l-kumpaniji kkonċernati jippreżentaw data dwar in-nanoforom ta’ sustanzi bħala parti minn dossier ta’ reġistrazzjoni ta’ REACH (skont ir-Regolament tal-Kummissjoni (UE) 2018/1881 tat-3 ta’ Diċembru 2018 li jemenda r-Regolament (KE) Nru 1907/2006). It-tiftix jirkupra reġistrazzjonijiet mill-bażi tad-data dwar is-sustanzi kimiċi tal-ECHA li tinkludi mill-inqas nanoforma waħda.
- Inventarju nazzjonali Franċiż: Fl-2013, Franza stabbiliet rekwiżit li n-nanomaterjali fis-suq Franċiż jeħtieġ li jiġu nnotifikati. In-notifiki jeħtieġ li jiġu aġġornati mill-kumpaniji jew mil-laboratorji pubbliċi fuq bażi annwali. Id-definizzjoni ta’ nanomaterjal għall-iskema Franċiża hija derivata mir-rakkomandazzjoni tal-Kummissjoni Ewropea għad-definizzjoni ta’ nanomaterjal, u l-limitu għan-notifika huwa ta’ 100 gramma, jiġifieri, taħt il-limitu ta’ tunnellata/sena li jkun jirrikjedi reġistrazzjoni skont ir-Regolament REACH. Innota li t-tunnellati rrappurtati fl-inventarju Franċiż jirriflettu biss it-tunnellaġġ tan-nanomaterjal, filwaqt li r-regolament REACH huwa bbażat fuq it-tunnellaġġ totali tas-sustanza importata jew prodotta fis-suq tal-UE, inklużi kemm in-non-nanoforom kif ukoll in-nanoforom tas-sustanza.
- Inventarju nazzjonali Belġjan: Fil-Belġju, fl-2016 daħal fis-seħħ rekwiżit nazzjonali li jiġu ppreżentati notifiki dwar in-nanomaterjali. Ir-rekwiżit ikopri sustanzi prodotti fi stat nanopartikolari u mqiegħda fis-suq Belġjan ta’ aktar minn 100 gramma fis-sena. Id-definizzjoni ta’ nanomaterjal għall-iskema Belġjana hija kważi identika għal dik tar-rakkomandazzjoni tal-Kummissjoni Ewropea għad-definizzjoni ta’ nanomaterjal. Innota li l-inventarju Belġjan jeskludi sustanzi naturali, mhux modifikati kimikament, u sustanzi li fihom il-partikoli tan-nanomaterjal jitqiesu bħala prodott sekondarju tal-attività tal-bniedem. B’mod konkret, l-inventarju Belġjan jirrikjedi r-reġistrazzjoni ta’ sustanzi u taħlitiet li fihom in-nanomaterjali. Barra minn hekk, artikli u oġġetti kumplessi li fihom nanomaterjal wieħed jew aktar jeħtieġ li jiġu nnotifikati - għalkemm id-dħul fis-seħħ tan-notifika ta’ artikli u oġġetti kumplessi għadu ma daħalx fis-seħħ. Hemm diversi eżenzjonijiet fis-seħħ, bħal dawk għall-pigmenti, il-kożmetiċi u l-prodotti bijoċidali. Il-kumpaniji iridu jaġġornaw l-informazzjoni tagħhom fuq bażi annwali.
- Inventarju tal-kożmetiċi tal-UE: Ir-Regolament KE 1223/2009 għandu regoli speċifiċi dwar l-użu ta’ nanomaterjali fi prodotti kożmetiċi, għalkemm ma jużax ir-rakkomandazzjoni tal-Kummissjoni Ewropea għad-definizzjoni ta’ nanomaterjal. In-nanomaterjali huma definiti bħala “materjal insolubbli jew bijopersistenti u manifatturat intenzjonalment b’dimensjoni esterna waħda jew aktar, jew struttura interna, fuq skala minn 1 sa 100 nm”. Awtorizzazzjoni bil-quddiem qabel l-użu tagħhom fi prodotti kożmetiċi hija meħtieġa għal prodotti bħal sustanzi koloranti, preservattivi u filtri tal-UV. Il-Kummissjoni Ewropea tippubblika katalgu ta’ prodotti kożmetiċi li jużaw in-nanomaterjali, u taġġornah regolarment abbażi ta’ data ppreżentata permezz tal-Portal ta’ Notifika tal-Prodotti Kożmetiċi (CPNP).
Minħabba d-differenzi fid-definizzjoni tan-nanomaterjali, l-eżistenza ta’ eżenzjonijiet speċifiċi, u l-limiti ta’ rappurtar tat-tunnellaġġ, il-preżenza ta’ nanomaterjal fi kwalunkwe wieħed minn dawn is-sorsi ta’ data ma jfissirx li huwa preżenti fihom kollha. In-nanomaterjali notifikati lill-inventarji Franċiżi jew Belġjani, jew permezz tal-Portal ta’ Notifika tal-Prodotti Kożmetiċi, ma jfissirx awtomatikament li s-sustanza trid tiġi rreġistrata bħala nanoforma skont ir-Regolament REACH u viċeversa.
Peress li s-sorsi li jikkontribwixxu għandhom regoli u ambiti ta’ rappurtar differenti, mhux dejjem huwa possibbli li titqabbel sustanza rrappurtata f’wieħed mis-sorsi ta’ data mas-sustanza fil-bażi tad-data tas-sustanzi kimiċi tal-ECHA. Meta l-ebda tqabbil ma jkun possibbli, is-sustanza fis-sors oriġinali ma tiġix irrappurtata fl-għodda tat-tiftix tal-EUON għan-nanomaterjali. Il-kumpaniji li jinnotifikaw in-nanomaterjali lill-inventarji nazzjonali Franċiżi u Belġjani jistgħu jkunu wkoll differenti minn dawk li għandhom obbligi ta’ reġistrazzjoni skont ir-Regolament REACH.
F’ħafna każijiet, sustanza tista’ tiġi manifatturata jew bħala nanoforma jew bħala non-nanoforma. Għalhekk, huwa possibbli li sustanza partikolari tiġi nnotifikata bħala nanoforma minn kumpanija waħda, iżda mhux manifatturata f’nanoforom minn kumpaniji oħra. Dawn id-differenzi jistgħu jirriżultaw f’sustanza li tidher bħala nanoforma f’sors wieħed, iżda mhux f’oħrajn.
Dikjarazzjoni ta’ ċaħda ta’ responsabbiltà
Xi wħud mill-informazzjoni rkuprata mill-għodda tan-nanomaterjali jaf tappartjeni għal partijiet terzi. L-użu ta’ tali informazzjoni jaf għaldaqstant jirrikjedi l-permess minn qabel tad-detenturi tad-drittijiet. L-Aġenzija Ewropea għas-Sustanzi Kimiċi u l-Kummissjoni Ewropea ma jagħtu l-ebda garanzija jew pleġġ fir-rigward tal-kwalità, l-użu u/jew l-idoneità tal-informazzjoni. L-użu tal-informazzjoni jibqa’ taħt ir-responsabbiltà unika tal-utent.
Jekk jogħġbok ikkonsulta l-avviż legali għal aktar dettalji.
Related information